MMBB: 唔返學的理由...

16.10.2013 (Wed)

 

 

十月初... MMBB 因為咳咳同流鼻水...

請過兩天病假...

自從呢兩天之後... 佢就開始知道病病係唔洗返學嘅...

於是... 有時起床後就會得到以下這些對話...

 

 

 

MMBB: 今日洗唔洗返學?

 

二少奶: 要...

 

MMBB: 不過我病病喎... 病病唔可以返學...

 

(註: 佢真係話「唔可以」呀... 好似好想返而被迫唔可以返咁!!!)

 

二少奶: 咁病病唔可以去公園... 唔可以飲 juice... 唔可以 (下刪五十字)... 你仲係唔係病呀?

 

二少奶真係估唔到而家啲小朋友早熟到 K1 已經識扮病唔返學...

 

 

 

好啦... 扮病幾次唔成功...

今日... 二少奶聽到一個更厲害的理由...

 

MMBB: 媽媽你睇下出面幾大風?

 

二少奶: 係喎... 樹樹都吹郁喎...

 

MMBB: 大風咪唔洗返學囉...

 

二少奶: .............

 

 

佢應該係見到上次 T3 大家好留意電視睇下打風洗唔洗返工返學...

一知半解之下覺得大風係有機會唔洗返學...

不過其實上次停課冇佢份... 因為佢返下午班... 係要照返的...

二少奶估唔到佢咁都聯想到...

 

二少奶聽到當時真係想爆笑...

不過為咗唔好令佢覺得返唔返學係可以 discuss 的...

於是我好認真咁解釋佢聽佢係要返學的...

 

 

 

點解? 點解咁細個就已經諗咁多計想唔返學?

二少奶認我係懶... 但係我唔會扮病唔返學...

我連讀 U 時都唔多走堂呀...

所以呢煲... 我點都唔認係我遺傳呀!!!