＜後補＞ 2011 日本東北之旅 - Day 9 之 Lake Town shopping...

昨日一篇 blog - 輕井澤賞楓...
二少睇完... 話乘車資料有錯誤...
哈哈... 改咗...
另外搵返 MMBB 食北海道雪糕的相片... 加返...
再睇請按...

話時話... 去旅行的安排計劃...
大至買機票訂酒店...
小至計劃行程唱錢等等...
多數都係二少做的...
除非二少奶有特別要求...
二少奶... 而家只係負責執行李...
確保 MMBB  一切所需不缺... 嘻嘻...

嗱嗱嗱... 唔係二少奶唔做...
係二少覺得二少奶唔精明...
會買貴嘢 or 安排不周...
既然係咁... 二少奶都樂於繞埋雙手等玩...


31 Oct 2011


日本東北之旅來到最後一日喇...
昨日雨濛濛... 今日又出太陽...

出發... 搭車時又眠一眠...
呢架 baby stroller... 平時真係好好用...
好實淨... 又穩定...
不過去旅行的話就真係太重...

原來 MMBB 對鏡頭都幾 sensitive...
發現有姑姐姐偷拍呀...
二少仲未知咩事... 哈哈哈...

是日目的地... lake town outlet...
呢個 outlet... 好大好大... 要行晒... 應該一日都行唔完...
點解特別要來?
因為二少奶佗 MMBB 時來呢度買到好多好靚好型又唔貴的 BB 仔衫...
一心諗住來幫 MMBB 入貨...
最後... 唉... 我最愛的 paul frank 搬咗...
唔知去咗邊...
為咗唔空手而回... 去 HABA 買咗手信...
送俾大緊肚的好朋友...
不過原來香港都有得賣... 二少奶唔熟行情... 唔知呀!!!
又再引證... 我買嘢的確唔係好精明...

好早出發... 好早逛完...
星期一... 二少又想去美登利食放題... (重溫請按此)...

不過... 估唔到排隊的人仲多過上次食夜晚...
因為要搭下午機... 唔等得咁耐...
唯有食 set... 放棄放題...
食 set... 就要行前少少去街頭的一間分店...

其實 set 都好抵食呀...
咁耐二少奶真係唔記得幾多錢...
總之好大份... 好新鮮... 好抵食...


 

 

 


一人一個 set... 再叫多一個壽司併盤...

美食當前... MMBB 都好興奮...

＜後補＞ 2011 日本東北之旅 - Day 8 之輕井澤賞楓...

日本東北之旅...
有少少... "餚" 極唔完的感覺...
去旅行時... 多多日都嫌唔夠...
返來寫 blog... 就覺得乜點解寫極唔完...
哈哈...

二少奶寫 blog 都寫咗好幾年...
以前寫 msn space... 生完 MMBB 轉地盤寫 yahoo...
以前寫 blog 冇壓力... 多字少相... 或者少字冇相...
想寫就寫... 亂發 up 瘋... 哈哈哈...
而家... 又唔係話好大壓力...
但好想好想寫晒 MMBB 的生活點滴...
好想好想記錄低 MMBB 的成長經過...
好多寫親子 blog 的 blogger 都話...
小朋友大得太快... 唔記低真係好快唔記得...
真係... MMBB 只係 16M 大...
我其實已經唔係好記得佢手抱時的事情喇...
每次翻睇自己個 blog... 其實都好開心...
成日覺得... 好彩有記低... 唔係真係冇咗一些好細微但又好重要的回憶...
所以... 暫時... 好想努力寫... 努力記...
二少奶... 好少咁有毅力... 哈哈哈...

又廢話完一輪...
繼續 "餚" 我個東北之旅...


30 Oct 2011


行程進入倒數第二日了... (仲差一日就寫完... Yeah!)
人在東京... 主力都係食同買...
起行時... 呢個 MMBB 仲未瞓醒...

不過今日有啲唔同... 有景點...
今日搭長野新幹線...

因為往返成田機場有個 Suica & NEX 優惠...
所以我們呢個行程有買 suica card... 又名西瓜卡...
其實類似八達通咁... 搭 JR 時唔洗買單程票... 遊東京市內幾方便...
不過... Suica 係不適用於新幹線的...
所以今日用 JR Pass...
我們買咗四日分開使用的 JR Pass...
之前往返東北同去日光用咗三日...
今日去輕井澤就用埋最後一日...

姑姐姐之前在麥當當換咗架新幹線列車俾 MMBB...
同呢架一樣樣o架...
好想 MMBB 同架車車合照...




可惜... 到上車一刻... 佢仲係咁樣...

一小時多的車程...
到站... 終於醒喇...
Welcome to 輕井澤...

唔洗抱仔... 幾輕鬆...

之但係影相時... 又想有個仔陪我啦...
哈哈哈...

次次來輕井澤... 都只係想 shopping...
今次... 有些少唔同...
因為要作「追楓」最後一擊...

楓葉好紅呀... 好似紅過晒東北所見的...
MMBB 有得騎膊馬... 好開心...

MMBB... 笑到雙眼同個咀都係「一」字型... 哈哈哈...

＜後補＞ 2011 日本東北之旅 - Day 7 之摘蘋果第二回...

29 Oct 2011


昨晚 stay budget hotel...
係就係迫啲... 不過日本酒店有樣好...
就係乾淨... 帶住 BB... 乾淨係最最最重要...

行完一日... 二少奶攰爆...
呢日神咁早... 二少三小姐佢哋話行下魚市場...
二少奶頂唔順... 棄權...
所以以下幾幅相... 我係唔知頭唔知路的...

 

 

 


不過... 我發現... 唔出去並唔等於可以瞓晏啲...
起身之後... 要一邊湊仔... 一邊梳洗... 一邊執行李...
其實仲辛苦... 唉唉唉...

 

好喇... 攪掂出發...
今日去邊?

 

去果園 again... 今次摘提子呀...

 

兩父子好緊張試食...
呢度係俾一個入場費... 在場內即摘即食的...
但帶走就要計重量再俾錢...

 

哈哈哈... 食過一粒... 大件事...
唔好食... 好酸... 咁點算呀?
唔通就咁就走?

 

仔... 都話唔好食... 你仲摘... 摘完唔食好浪費呀...

 

唔摘提子... 賞下花算啦...

 

好美...

＜後補＞ 2011 日本東北之旅 - Day 6 之奧入瀨溪流 (2)...

28 Oct 2011


繼續奧入瀨之旅...
算我詞窮... 除咗靚... 我真係唔識形容呢個地方...




換完片片... 心情靚返晒...




扮下醒目樣先...

咩事咁開心呢?

 

學識同爸爸玩 hi five 呀...
其實係佢開心咋... 試想想抱住佢嗰個...
要同佢玩... 就只可以單手抱...
雖則話 MMBB 輕身啫... 抱得耐都好甘o架...

 

又到慳字時間... 即係寫真集出動的時候...
MMBB 奧入瀨溪流寫真... 請慢慢欣賞...

 

 

 

 

＜後補＞ 2011 日本東北之旅 - Day 6 之奧入瀨溪流...

28 Oct 2011


昨晚又係天黑先到... 睇唔到個溫泉旅館的樣子...
今日補影返... 野之花燒山莊...

內在裝飾...

早餐... 冇之前妙乃湯咁豐富咁好食...

準備 check out...

出發去我呢個行程最最最期待的一個景點...

就係奧入瀨溪流喇...
當日睇完 "C 其遮" 的紅葉瀛楓...
就超想來見一見漫山楓葉的情景了...

開始進入十和田公園...

沿住奧入瀨溪流行完呢條「步道」...
就會見到十和田湖...
當然... 中間會經過無數的瀑布...

見到溪流喇...

MMBB 都好興奮?

兩位「攝影大師」不斷調較相機...
不斷試影又試影...
務求拍攝到水流不息... 水花四濺... 洶湧澎湃的一剎那...
哈哈... 好彩... 見得人唔多...
唔係又執死二少奶...