MMBB: Sorry 媽媽...

25.10.2013 (Fri)

其實... 今日想寫的... 90% 都係激氣的...

只有最後一幕係叫做甜甜地...

label 為 One sweet moment... 真係好貼切...

因為真係得 one moment 係 sweet 的... 多一秒都冇!!!

話說 MMBB 最近的脾氣愈來愈差...

好喜歡 "包拗頸"...

又好鍾意扭計...

但係拗的扭的大多數都係無聊事...

未必次次都有道理可以同佢講...

好多時... 二少奶都係以嬲佢等佢知驚唔好再扭作結...

雖然呢個唔係一個好辦法...

但係有時真係無心機精神同佢鬥智鬥力...

只係想速戰速決...

 

 

 

呢日... 佢前前後後扭咗三四次計...

我已經唔記得佢扭過咩...

解釋過... 順從過... 罵過... 氹過... 都唔得...

總之佢就一味 "long 黎"...

最後我嬲咗佢... 成晚唔睬佢...

講緊呢個 "成晩" 其實只係睡前唔夠一小時...

不過已經足夠佢爆喊爆喊再爆喊...

 

孻女孻五臓?!

Sep 2013


Ah mUi MUi... 我的寶貝 BB...

一個好乖好乖的 BB...
 

早前讀過一篇文章...

育兒專家最擔心的就是父母眼中好乖的 BB...

因為他們易湊不扭計... 較容易被父母忽略...
 

Ah mUi MUi 絕對是這類型的 BB...

我希望我們不會成為忽略她的父母...
 

以前成日聽人講... 孻仔孻心肝... 孻女孻五臓...
二少奶細個時... 都唔鍾意大人下下叫大讓細...
 

但係當自己擁有兩個小朋友的時候...
就真真正正知道... 做大... 幾時都係最 "著數"...
咩都唔講... 淨係計對住爸爸媽媽的時間...

都已經絕對性地多過做細啦！
 

況且... 當細嘅未出世時... 做大的一定萬千寵愛... 

唔知係唔係呢個原因... 以前的父母會多愛錫細嗰個... 當彌補？
 

MMBB 係一個痴媽 B...

所以... 當二少奶陀住 Ah mUi MUi 的時候... 

不時都會提醒自己... 唔可以忽略 MMBB...

唔想佢會心存妒忌... 影響佢同 Ah mUi MUi 的感情...
 

到 Ah mUi MUi 出世了...
好好彩... MMBB so far 都冇爭寵... 亦冇呷醋...
 

二少奶覺得... 其實係 MMBB 本身性格溫純...
所以佢好錫妹妹...
而 Ah mUi MUi 本身係一個唔難搞的 BB...
唔需要長期霸佔爸爸媽媽...
 

二少奶自覺本身冇偏心... 男女大小一樣咁愛錫...

但當時間... 心神... 精力... 都無法來個 double 的情況下...

湊兩個比起湊一個...

小朋友實際接收到的一定係分薄咗！
 

而當一個係極難纏懂要求的 trouble two...

另一個係乖到好似只有 basic needs 的 newborn...

邊個分得多邊個分得少就好顯然易見！
 

二少奶對呢個狀況... 有時都覺得好無奈...

幸好踏入九月... 有啲轉機...
 

一來 MMBB 開學... 我可以有更多同 Ah mUi MUi 獨處的時間...

二來 Ah mUi MUi 活動能力多咗... 反應多咗...

自然地我們就多咗三個人一齊玩的時光！
我真係好期待更多的三人行時間... 笑聲 tripled... 開心 tripled...
 

二少奶相信... 平衡從來都係好重要...
雖然好難 achieve...

 

但無論如何... 二少二少奶都會努力...

令 MMBB 同 Ah mUi MUi 呢兩個寶貝...

能夠相親相愛地成長！
 

 

 

 

 

梁師奶...

 

二少奶... 唔係一個稱職的師奶...

不過... 我屋企有一個...

梁師奶... MMBB 是也... 哈哈哈...

 

 

 

MMBB 好喜歡去 supermarket...

去襯都要幫手拎嘢...

 

 

 

拎到好似 OL 拎手袋咁...

其實... 可唔可以 man 啲啲呢?

 

 

 

乜都想幫手拎...

輕則有麵包...

 

 

 

重些少有瓜果...

 

 

 

有時拎一樣唔夠...

用齊兩隻手先 happy...

 

 

 

幫 Ah mUi MUi 買嘢就最落力...

罐奶粉... 連上落樓梯都唔肯俾人幫手...

 

 

 

點都要攬到實...

返到屋企... 仲要向 Ah mUi MUi 邀功...

 

 

 

呢日有新挑戰...

幫爸爸買汽水...

 

 

 

佢趁二少奶同工人姐姐唔為意時...

自己走去拎咗盒八罐的過來... 真係俾佢嚇親...

 

 

 

之後二少奶話要買十二罐裝...

MMBB 二話不說又再拎過...

無論我點阻止都誓不罷休...

真係估唔到... 呢隻細細粒 BB 竟然咁大力...

應該好快就可以勁過二少奶...

 

 

 

話明係一個稱職的師奶...

買嘢之餘... 梗係要儲埋印花...

集嫲嫲婆婆同我們三家人之力...

終於儲夠...

 

 

 

仲要加成四百個大洋先換到...

呢個 MMBB 指定要換的豬豬喼...

諗起屋企無啦啦多咗件大玩具...

再諗起第日旅行要顧多件行李...

二少奶... 其實有少少後悔咁努力幫阿梁師奶手儲印花!!!

 

 

 

 

Happy Halloween!!!

26.10.2013 (Sat)

 

是日黃昏有 Halloween Party...

MMBB 同 Ah mUi MUi 都係第一次參加 Halloween Party...

 

Party 前先到中山紀念公園放放電！

行海濱長廊... 我們差不多每見一隻船或每見一隻小狗都要停低 "觀賞"...

名副其實的 "慢步" 海旁！

 

終於行到孫中山像...

個草地好靚... 靚過維園...

 

叫 MMBB 影張相先...

得出呢個樣... 唔知想點?

 

草地... 真係小朋友跑跑跳跳的好地方...

可惜... 香港地真係草地難求！

 

今日支 bubble 槍玩玩下失靈...

二少奶又因為太多嘢拎冇帶個足球...

冇嘢玩之下... 自由體操一番！

看! 草地多美好! 點玩都得!

 

Ah mUi MUi... 仍舊一舊飯咁睇哥哥玩...

 

轉戰小公園...

 

唔太大... 好多小朋友...

 

MMBB 玩咗一陣就拉咗我上樓梯去瞭望台...

原來上面有個室內泳池... 都好靚...

MMBB 睇人游水... 然後係咁話自己游水唔洗浸個頭落水... 

唔敢就唔敢啦！哈哈！

 

見到對岸的 ICC 好興奮...

係咁話上面好高... 上次去時睇到好多好多屋頂！

 

放完電... 去開 Party...

變身 spider...

 

因為呢個 party... 二少奶早幾日帶 MMBB 去買 costume...

佢一見到呢套衫就話要做 spider...

但係套衫個 size 係 infant ~ 24M...

同埋好厚！

二少奶嘗試說服 MMBB 揀第二個造型...

但係佢堅持...

 

 

 

二少奶唯有去其他地方睇下有冇啱身啲的 spider 衫...

行咗成條石板街...

蜘蛛女 or Spiderman 有好多...

咁 Cute 的 spider 就真係冇...

冇得揀... 就算細就算厚都要買啦！

 

 

 

不過好彩有買... MMBB 好鍾意...

要成晩著住... 食飯都唔肯除！

 

 

除咗 spider... 仲有 spiderman 同小小兔...

 

同埋 big pumpkin...

 

 

 

全部都好可愛呀！

 

 

 

點解係 big pumpkin?

因為有個 small 喺度...

哈哈... Ah mUi MUi 都有份扮南瓜...

後面個蜘蛛網... 係主人家親手製作... 超正!

 

 

 

大小南瓜... 好得意...

 

 

 

Spider 哥哥加 pumpkin 妹妹...

兩個都................... 衣不稱身... 哈哈哈...

 

 

 

又係高難度的大合照時間...

 

 

 

大個咗... 好似冇以前咁難........... 擺埋一齊... 望鏡頭另計!!!

最好笑係影完... 個個小朋友都極速 9 秒 9 四散...

得返唔識郁的 Ah mUi MUi 獨自留守等人救... 哈哈哈...

 

 

 

trick or treat 時間...

個個小朋友都拎住個南瓜袋逐間房敲門...

仲好怕同人溝通的 MMBB... 為咗拎到糖糖...

都硬著頭皮答咗唔少問題呀!!!

 

 

 

唔知係唔係大個咗...

男仔同女仔玩玩具的 preferences 開始唔同...

是晚竟然有分男仔堆同女仔堆...

spider 同 spiderman... 當然係一 pair 啦...

 

 

 

呢個... 未埋到堆...

兼怕嘈怕生保... 成晚唔係皺眉就係大喊... 慘慘!

 

 

 

玩完一輪仲有個好靚靚的雪糕蛋糕...

再加埋兩位好 daddies 專誠外賣超好味的桑寄生蓮子蛋糖水...

大人細路都大大大滿足!

多謝 party host 的盛情招待!!!