MMBB 上學前...

Sep 2013


K1... 二少奶終於可以湊 MMBB 返學了...
之前 PN 唔得... 因為 MMBB 離開我會喊...
所以通常都係姐姐湊返學... 二少奶湊放學...
PN 行返學... K1 轉咗校就坐校車...
 

校車站其實有好多小朋友...
不過 MMBB 十級慢熱...
唔會主動同小朋友玩...
 

而湊小朋友等校車的... 多數係工人姐姐...
二少奶就算想搭訕... 亦有心無力...
 

哈哈... 好彩學校個個小朋友都有 name tag...
二少奶睇下個 tag 都叫到啲小朋友名...
小朋友好天真... 見你唔識佢但叫到佢個名就會好開心...
就咁... 二少奶就幫 MMBB 識咗 S 姐姐同 N 姐姐...
不過 MMBB 仲未敢自己同佢哋 say hi...
 

等校車的時間... 就是我們無無聊聊傾下偈談下心的時間...
談下天氣樹葉... 談下白雲飛機... 談下蚊蚊只係咬我唔咬 MMBB...
傾下放學去邊... 買咩生果...
 

睇下叔叔搬蒸餾水... 又睇下 security 叔叔指揮交通...
研究下點解貨車有個士啤呔... 點解 BB 未識行要工人姐姐抱...
 

數不完的無聊話題...
講下笑下... 好開心...
 

校車到... MMBB 會拖住我行去校車...
行得特別慢... 應該係唔想走...
佢會講 bye bye... 不過唔會望住我...
記得的話... 佢會俾個 goodbye kiss 我...
 

上到車... 如果唔係坐第一排... 我唔會見到佢...
因為佢好細粒... 個頭唔高過個窗... 哈哈...
 

如果坐第一排... 佢會望住我揮手...
冇笑容... 眼神好唔捨得... 好似想喊咁樣...
見到呢個樣... 二少奶就會心頭一酸...
 

我知道... MMBB 仲會成日想痴住媽媽的時間唔會好長...
過多幾年... 我想佢痴... 佢都唔會「蘇」我...
 

我好好彩... 呢一刻可以陪住 MMBB 經歷「上學前」...
擁有好多美好回憶... 我知道得到這些經歷是奢侈的...
 

 

 

多謝二少... 包容我的任性...
包容及支持一個生產力極低的全職媽媽!
放心啦... 我會教 MMBB 孝順你的! 哈哈哈!